 |
| نصائح من ذهب لطلبة كليات الهندسة الجدد | مكتبة المهندس |
المقال دي هنتكلم فيها عن موضوع مهم جدا وجدااا جداااا كمان بس لإخوانا الطلبة الجدد في جميع كليات الهندسة ، طبعا حضرتك تعبت وطلع عينك وسهرت الليالي وشربت قهوه ونسكافيه علشان تقدر تركز وتصحصح علشان تحصل أكبر قدر من المعلومات وتجيب تقدير عالي وتحقق هدفك اللي تعبت علشانه وتدخل كلية الهندسة .
مرحلة تقديم الأوراق للإلتحاق:
في المرحلة دي بتكون مبسوط جدا وفرحان علشان شايف إن هدفك بالفعل خلاص إتحقق وخلاص رجلك بدأت تدخل العالم اللي حضرتك طلع عينك علشان تكون جزء منه وتكون البشمهندس .طبعا في اليوم دا بتكون الإنسان البصباص بمعني أخر أبسط للي مش فاهم يعني حضرتك بتحب تستكشف بعينك كل حركة حوليك سواء الاشخاص الجديدة اللي بتقدم معاك أو الأماكن المحاضرات اللي متخيل نفسك قاعد فيها خلاص.
المرحلة الثانية الترم الأول :
أنا من وجهة نظري شايف أن الترم الأول من الكلية مرحلة لوحده لأن بتشهد فيه مدى الإختلاف بين مرحلة سابقة تعتمد على مدرس بيأكلك المنهج بمعلقة في الدرس الخصوصي والمدرسة الثانويه بتاعتك ومرحلة تانيه مختلف تمام بتعتمد فيها على نفسك ومجهودك هتتعب شويه في المرحلة دي وأنا أقصد بيها الترم الأول لحد متتأقلم على النظام الجديد .نصائح المرحلة دي أيه ؟
- حاول تقعد مع حد أكبر منك شويه في الفتره دي علشان طبيعي أنه عاش نفس المرحلة في نفس الظروف الخاصه بيكم أنتم الأتنين فهيساعدك.
- أنسى جو الحفظ اللي أتعودت عليه في الثانويه العامة علشان هندسه فهم.
- حاول أي محاضره أو سكشن تذكره يوم بيوم علشان هتعاني الفترة دي من مشكلة الضغط في الوقت مش زي الثانويه العامة كانت براااااح.
- جمع إمتحانات الأعوام السابقة وتدرب على حلها ومتخفش من أي حاجه طول منتا فاهم ومذاكر.
- هقول تاني ذاكر كل محاضره وسكشن أول بأول هتلاقي مواد أكتر من الثانويه ومحاضرات وسكاشن كتير وطول اليوم في الكليه وبترجع تعبان ومرهق فلو كسلت يومين تلاته هتتراكم عليك المواد وهتحس بتوتر هيأثر عليك نفسيا.
مرحلة بعد الترم الأول وحتى التخرج:
أنا من وجهة نظري شايف إن ما بعد متعدي الترم الأول على خير خلاص كل اللي جاي هيكون تكرار ، هتكون طبعا أتعودت على النظام وفهمت نظام الدكاترة اللي عنك في الكلية ، المهم إنك متكسلش ومتكبرش دماغك وذاكر كل يوم بيومه ومتفكرش إن هندسة عقبه مش هتطلع منها بالعكس خالص اللي كان بيشتكي من هندسة من خمس سنين مضت وقال مستحيل هطلع منها دلوقتي بسم الله ماشاء الله عليه مهندس قد الدنيا وبيدير موقع كامل .
وفي النهاية تفائلو بالخير تجدوه ، وبالتوفيق للجميع.
إدعمنا وشارك الموضوع المقدم من موقع ومدونة المهندس العربي .